Njoftim për miratimin e tarifave për vitin 2026 

Në përputhje me Ligjin për të Drejtat e Autorit dhe të Drejtat e Përafërta Nr. 08/L-205, Kosova Music Rights Society (KMRS) njofton se janë miratuar tarifat për përdorimin e veprave muzikore të mbrojtura.

Këto tarifa përfaqësojnë shumën që përdoruesit e veprave muzikore duhet të paguajnë për të siguruar përdorimin e ligjshëm të krijimeve muzikore, në përputhje me të drejtën e autorit.

Tarifat hyjnë në fuqi nga data 1 janar 2026 dhe janë të detyrueshme për përdoruesit.

Roli i KMRS në Zbatimin e Ligjit për të Drejtat e Autorit

Kosova Music Rights Society (KMRS) funksionon si organizatë e menaxhimit kolektiv të të drejtave autoriale (CMO). Roli i KMRS është të zbatojë në mënyrë të drejtëpërdrejtë dhe të plotë Ligjin për të Drejtat e Autorit dhe të Drejtat e Përafërta Nr. 08/L-205, duke siguruar që përdorimi i veprave muzikore të mbrojtura të bëhet në përputhje me legjislacionin në fuqi.

Në këtë kuadër, KMRS licencon përdorimin e veprave muzikore në hapësira publike dhe ambiente komerciale, mbledh tarifat për përdorimin ligjor dhe menaxhon fondet e mbledhura, të cilat shpërndahen tek krijuesit, të cilët janë përfituesit ligjorë të këtyre të ardhurave.

KMRS operon mbi bazën e licencës së saj ekskluzive, të fituar më datë 10 prill 2025 nga Minsitria e Kulturës, Rinisë dhe Sportit, dhe vepron gjithashtu në koordinim me organizata ndërkombëtare të menaxhimit të të drejtave autoriale, përfshirë partneritetin të ngushtë me SACEM France që nga themelimi i KMRS.